ＡnNａ・日記~ヾ(ﾟｰ^*)☆,｡

同Nick係ｍｓｇ冷戰左一日，我成晚冇覆佢ｍｓｇ，佢亦都冇氹返我。
已經對呢段感情心淡晒，覺得分開左都唔可惜！
果晚意外地同阿恒幾好傾，然後開開心心咁訓覺！
起身時亦都覺得冇乜大不了，佢唔主動搵我亦都證明左佢有幾需要我！
不過都覺得自己係佢最煩心既時候咁樣耍脾氣好似好衰，
可能佢已經好疲憊，亦有想過慰問佢媽咪點，不過都係費事…
晏就時，熟悉既Wechat icon閃起！
Nick問我買左全月通未？好似咩事都冇發生過，R話題講咁
我承認佢搵返我，係開心既。
我即刻覆佢買左喇，你媽媽點？
跟住佢都同我講左好多，都知道佢心情實好低落…
跟住佢問我有冇興趣一齊去佔中？仲好客氣咁問"唔知你會唔會唔方便呢？"
見外到咁我忍唔住笑左，覺得佢怕羞怕瘀但都鼓起勇氣咁約我都幾得意
之後約左出黎見面，大家都冇拖手，我都故意保持距離，但中間都有講下野既。
食飯時佢都有同我講工作既煩惱，不過我都唔係幾想安慰佢…
之後我地搭車去金鐘，我地入到去冇好似以前咁攬埋一舊，
我企埋一邊玩電話，一句野都冇講過，佢都玩起電話黎，大家一直去到現場時都係零交流。
然後去到現場，果度好多人！但係大家又好有秩序，個個陌生人都好似一個大家庭咁守望相望，
我地心情都澎湃起來！我地開始興奮地交談起來，又跟住一齊歡呼or叫口號！
擠迫既人群將我同Nick緊緊相貼，我抆住佢既背囊跟實佢行。
然後大家都要爬過石壄過對面，我地以前唔駛一定爬，就繼續向前行。
跟住見到前面d人又爬過去，我同佢講"早知爬前面果個，呢個咁高既"
果陣係我同佢成晚第一次近距離咁眼神對望，語氣帶點往日既撒嬌。
Nick好專注咁望實我講完成句，好溫柔咁話"係囉~我地駛唔駛行返過去？"
果刻有返我地情侶般既feel，跟住我就一路話"唔駛，就爬呢個啦"，一路牽起佢既手向前行。
Nick即刻同我十指緊扣返，同埋另一隻手攬實我腰，將我成個人一擁入懷
我都攬返實佢，然後佢錫左我頭髮一下
跟住我地就好返喇！但係維持左一陣，佢又故態復萌咁臭串咁回應我，
我一時又心淡返，垂低眼唔想再望佢，拖實佢既手都無力鬆開晒。
我咁難得不計前嫌拖返你，竟然都唔識珍惜做好d！乞人憎！
Nick即刻知驚氹返我，佢即刻拖實我隻手fing，又攬實我將我挨近佢膊頭。
又嘟長個嘲扁咀我睇，又拎我隻手黎打佢塊面，
但我依然冰冰的好似木頭人咁，因為果陣心裡諗緊分手好唔好…
走時都有講下野，但上車後我眼訓加灰心既關係，自己揸住碌柱閉目養神。
Nick唯有企我隔離係咁玩電話解悶。
我一句野都冇同佢講，到朗屏時我同佢講："我落車喇，拜拜"
Nick就堅持話要送我返去，果陣都11點半，都算佢啦 haha
但沿路上大家都係保持沉默地各有各行。
然後行到屋企樓下條馬路，我諗分唔分大家都要講清楚好d，
費事唔知咩情況，聽日都唔知msg唔msg佢好！
等馬路時，我笑住問佢考慮我條問題點樣？(我之前msg話如果冇左我，佢就可以煩少樣野)
佢望住我欲言又止，我地就過埋馬路企係爭鮮門口講。

我有點後悔，之前沒有毅然接受恒…
現在的他，好像故意跟我保持點距離，
雖然還是天天找我，不願完全跟我斷掉。
剛才都主動約他星期一或二一起去交學費，
打算交完後一起食個飯約約會，
但他說星期一要洗牙，星期二不想特地出去交學費…
我想到以前的他，肯定很樂意答應，
因為他很想看到我…以前。

已經成個星期冇拍過拖，佢總係有時間就分配晒比朋友家人表弟…
最後有時間剩先比我…
佢唔係將女朋友放在第一位既人，佢一D都唔重視我，
唔想見我，唔掛住我…
平時已經唔夠sweet、唔夠愛錫我、成日想激我，
仲要冇咩時間陪我！！！
忍心我孤獨寂寞苦悶！！
覺得自己有種地底泥既感覺…
我一再容忍佢，對得住自己嗎？
諗起以前阿恒點都會抽時間黎見一見我，
即使果陣佢同朋友食完飯已經好夜，第二日要返早工，
但佢就係願意黎到我樓下想見一見我。
我感受到佢真係好渴望見到我，見到我會好開心，
佢望住我既眼神係怕羞而閃爍住光輝，
佢會定定地凝望住我，而嘴角向上揚…
但我嘗試過同Nick對望過，佢只會皺晒眉頭好古怪咁打量我…
但我之前選擇左Nick而拒絕過恒做佢女朋友，
又因為同Nick出街唔理阿恒…
而家同恒既關係已經冇以前咁曖昧，我地而家對話只係普通朋友…
所以我好怕冇拖拍冇人要，我怕寂寞！！
如果同阿恒好返就好…但我而家點算好？
已經唔想同Nick講野了，今日全日我只講過三句野咋…

突然很想趁我仲有清晰記憶時，用文字來紀錄我同恒之間短暫既小故事。
因為我知道可能很快會淡忘…會淡忘這段短令我甜蜜心動的窩心小故事。

今年4月，我正式開始夜校生涯，讀個high diploma。
班中多數係男性，有一半後生仔，但好多都麻麻。
阿恒係我覺得全班最養眼既男仔。 (哈哈哈)
五官似韓仔，身型高大，衣著簡單，總之有種清爽乾淨既感覺。
佢都好認真聽書，好少玩電話，但就好似cool cool地咁。
不過我都唔期望/冇諗住要識佢，亦都冇咩特別感覺，上堂都好少望佢。
然後我後期開始同左佢地果堆人熟左，有日放學一齊行，大家傾緊考試範圍，佢都有搭幾句嘴，感覺佢都唔係太cool啫。
然後幾日後，就係我同Nick三個月正日冷戰之時，突然收到佢Whatsapp我，問我叫咩名，要入返落通訊錄。
當日我地晏就吹水到夜晚訓覺。
從此開始，我手機每日都會收到恒既msg。每日都係由起身早晨，到夜晚早抖。
我地漸漸期待對方既msg，開始期待每一次上堂，慢慢開始講野曖昧…

阿恒既情緒開始受我驅動，會因為我嬲左佢而唔敢上堂，黎完簽到就搭車走；
亦會因為我話想見佢，就會撲返黎上堂…
有次佢遲左起身唔知趕唔趕黎好，我答佢"你鍾意啦~唔攰就黎啦"
佢就話感受唔到我想見佢，而冇黎上堂。
有次佢故弄玄虛咁，明明應該早過我到學校，但最後我打開門都唔見佢勁失望…
然後msg問佢係邊？佢話"唔知呢" 我果下又以為佢又曠課心淡晒。
然後佢問"你好想見到我咩？" 我話"係呀，我想見你 >.<"
呢個時候突然見到走廊果邊既窗外有野移動，跟住就見阿恒突然打開門出現！！
果下覺得好似電視劇般既情節神奇又浪漫！
特登匿埋吊我癮，等我話好想見佢時就好似變魔法咁突然出現！

兩星期前吵完架，好返；
兩日前再吵架，又好返；
好返完兩日，又吵架…
永無止境的吵架，點解每次吵完架，
阿Nick都無法改善自己既問題，依樣做出傷害我地關係既野？
令我開心的情深說話佢唔會講，
只會講令我沮喪的惡意玩笑，
佢唔中意氹我睇我開心既樣，
最中意激我睇我又嬲又灰既樣…
情歌佢唔唱，最中意哼d好心分手、分手要狠既歌比我聽…
同佢一齊，從未被當寶段愛錫珍惜，
只有經常性的人身攻擊，使我經常由天堂跌落地獄…
從未遇過這樣的男朋友會咁對女朋友，
呢4個月內，我冇覺得自己搵到一生幸福，
只有隔幾日就浮現出既分手念頭。
拍拖應是甜蜜幸福快樂…
但現在的我很慘，很不快樂。
應該放棄嗎？也許他還不是我最後那位，也許我愈在佢身上磋砣，便讓我的那位他愈要久等…

男朋友，不是這樣的；
拍拖，不是這樣的；
愛，不是這樣的…

近日無什麼話題可說的我和Nick，
昨晚在電話再次陷入分手邊緣，
希望我記住這一剎的感覺，
縱然是不捨得他，但與他分手是正確的。

同Nick三個月，第二次係紀念日又吵架冷戰…
佢呢幾日陪唔到我我都冇怪佢，
我只係要求佢講一句三個月快樂啫，
點解佢都要覺得咁困難？！！
點解可以又因為一件咁小既事黎同我以事論事、發晒脾氣架？
佢係咪有病架！！！
正常情侶都係咁架啦！！講一句野會死咩屌你！！
講句sorry認下錯咪算囉，我都唔係嬲佢，只係同佢講咁我會失望啫！
點解咁簡單佢都做唔到呀！！
佢真係唔識拍拖…他不配被愛！！
但我而家真係心好痛，
我唔想又冇左段花左三個月心機既感情，
尤其我仲好喜歡佢…唉…
你可唔可以溫柔d去愛我理解我？

有時我會想，
雖然現在的男友很專一愛著我，
但應該不會是個浪漫又窩心的男友，
我應該不能在他身上獲得以前的男友給過我的快樂、幸福與驚喜吧？
也許之後的日子要多平淡有多平淡，
也許像是一個人的戀愛，
沒有浪漫驚喜，沒有甜言蜜語，
難再享受不到戀愛的甜滋味。
也許還是會感到寂寞孤單嗎？
我也懶得花心思去討好他，
反正他就是一塊木頭，
有時也令我懷疑他愛不愛我，
一切是如此平淡乏味………
總之我沒了以前談戀愛的衝勁和甜蜜。
討厭我的感情世界變得如此悶蛋！

今晚Nick放工係荃灣西站等埋我一齊搭車，
係車上攬住互相挨住傾閒計好開心，
又幫我拎住飯盒袋，
然後又落埋車送我到屋企樓下，
沿途好溫柔體貼，十指緊扣愉快地聊天，
佢係咁問我星期六收工會唔會好攰，
黎唔切同佢表弟食都唔緊要，夜黎就去食宵夜糖水，
總之幾夜都會等埋我陪我食野！
然後又話其實果日冇野做，
諗住黎灣仔接我收工跟住一齊去晚飯！
行到返屋企時又話以後可以多d黎美孚陪我一齊搭車，
仲話“為左你等多幾個字都冇所謂~”
今日發覺我的男朋友從沒有變，
依然是那麼好，依然好錫我，
只是佢有時都會做完野攰會冇咩精力，
我應該多D體諒佢！
今晚雖然見得一陣，但我地之間既感情都大大提升了！
我對佢既不滿同隔膜都一掃而空了！

拍拖兩星期，開始覺得Nick又唔係真係咁好…
其實又唔係咁多話題同搞笑野講，
同埋呢排又好似少左關心我…
之前好sweet好幸福既感覺都冇曬…
令到我都唔係好想同佢講野添…
現實總係冇咁想像中順利，
我開始又想放棄，
又再盤算著單身的好處及時間分配，
所以我唔會驚分手，
而家都係見步行步，
但個心已經唔似之前咁投入lu~
我係果種一有唔妥就即刻放棄既人，
我唔想浪費時間係唔適合既地方，
因為咁會少左日去尋覓更加適合我的～